In-A Brixtan Market

I walk in-a Brixtan Market
believin I a respectable man,
you know.  An wha happn?

Policeman come straight up
an search mi bag!
Man -- straight to mi
Like them did a-wait fi mi.
Come search mi bag, man

Fi mi bag!
An wha them si in deh?
Two piece a yam, a dasheen,
a han a banana, a piece a pork
an mi lates Bob Marley.

Man all a suddn I feel
mi head nah fi mi.  This yah now
is when man kill somody, nah!

'Tony', I sey, 'hol on.  Hol on,
Tony.  Dohn shove.  Dohn shove.
Dohn move neidda fis, tongue
nor emotion.  Battn down, Tony.
Battn down.' An, man, Tony win.